Rundunar jami’an hana sha da fataucin muggan kwayoyi ta kasa NDLEA reshen jihar Kaduna a ranar Alhamis ta bayyana cewa ta kama mutane 111 masu safarar miyagun kwayoyi tsakanin watan Janairu zuwa Fabrairun 2022 a jihar.
Mista Umar Adoro, kwamandan rundunar na jihar Kaduna ne ya bayyana hakan a wata hira da ya yi da Kamfanin Dillancin Labaran Najeriya, ranar Alhamis, a Kaduna.
Ya ce yawancin wadanda ake zargin sun kai shekaru 16 zuwa 30.
Ya bayyana cewa an kama mutane 34 a watan Janairu daga cikinsu 31 maza ne, yayin da uku kuma mata ne, ya kara da cewa an kuma kama kwayoyi masu nauyin kilogiram 295.680.
“Mun kama kilogiram 292.125 na tabar wiwi, da kilogiram 0.001kg na Heroin, da kuma kilogiram 3.554kg na abubuwan da ke damun kwakwalwa kamar Benalin, tramadol da sauransu.
“A watan Fabrairu, mun kama mutane 77 da ake zargi daga cikinsu 74 maza ne yayin da uku kuma mata; kuma an kama jimillar kwayoyi 320.508,” inji shi.
Adoro ya bayyana cewa daga cikin adadin magungunan da aka kama sun hada da kilogiram 294.101kg na tabar wiwi , sai kilogiram 0.034kg na hodar iblis, da kilogiram 0.005 na Heroin yayin da kilogiram 26.358kg na psychotropics da kuma kilogiram 0.010 na Methamphetamine.
Ya kara da cewa hukumar ta kuma gano wani sabon fulebo mai samfurin alkalami mai dandanon Shisha, wanda dandanonsa na dauke da man wiwi, wanda matasa ke amfani da shi.
Ya bayyana cewa an rufe shaguna 5 sannan an kama mutane hudu da laifin sayar da fulebo tare da kama kilogiram 9,932 da akayi baje kolin su.
Kwamandan ya bukaci iyaye da su kula da unguwanninsu ta hanyar lura da abubuwan da suke ci ko amfani da su da kuma abokan da suke cudanya da su, don gujewa shan miyagun kwayoyi.
“Kamar yadda kuke gani, wannan sabon fulebon mai tambarin alkalami mai dandanon Shisha ya yi kama da alkalami na yau da kullun kuma ana iya caji, don haka da wuya a gane shi Shisha ne; baya ga dadin dandano yana dauke da man wiwi.
“Wasu daga cikin matasanmu ba su ma san cewa yana da hatsarin cin abinci ba, shi ya sa iyaye da masu kula da su ke bukatar su kasance a faɗake game da duk wani sabon abu ko abin da unguwannin su ke kawowa gida,” in ji Adoro. (NAN)
