Zazzaɓin Lassa Ya Kashe Mutane 8 A Gombe

Zazzaɓin Lassa ya kashe mutane takwas a Jihar Gombe daga watan Febrairuzuwa yanzu, in ji Dakta Nuhu Bile, ƙwararren a fannin cututtuka masu yaɗuwa na Ma’aikatar Lafiya ta jihar.

Bile, a wata ganawa a jiya Laraba da Kamfanin Dillacin Labarai na Ƙasa, NAN a Gombe ya ce kawo yanzu, mutane 225 a ka yi wa gwajin cutar a jihar.

A cewar sa, 20 daga cikin waɗanda a ka yi wa gwajin su na ɗauke da cutar, inda 10 kuma an musu magani an sallame su.

Ya ƙara da cewa mutum biyu da a ka tabbatar sun kamu da cutar su na can a kwance a na duba su, inda takwas kuma su ke jiran ko-ta-kwana.

Bile ya bayyana cewa an samu bullar cutar ne a ƙananan hukumomin Balanga, Funakaye, Kwami, Kaltungo, Nafada da Gombe.

Sai dai kuma ya ce garin Dogonruwa da ke Ƙaramar Hukumar Kaltungo ne su ka fi yawan masu ɗauke da cutar a jihar.

Ya ce bayan da a ka samu bullar cutar a jikin mutum 5 a watan Fabrairu, tuni gwamnatin jihar ta tashi tsaye don daƙile yaɗuwar ta a jihar.

Leave a Reply

Your email address will not be published. Required fields are marked *

Social media & sharing icons powered by UltimatelySocial
YouTube
YouTube
Instagram