Sanata Kashim Shettima Ya Lashe Zaben Fidda Gwani Na Sanatan Borno Ta Tsakiya A Jam’iyyar APC
Kashim Shetima ya sake lashewa takarar sanata babu hamayya da kuri’u 479 da wakilai suka kada a zaben da ya gudana a sakatariyar jam’iyyar APC ta jihar a Maiduguri babban birnin jihar Borno.
Honorabul Musa Mahmoud shugaban kwamitin zaben fidda gwani na sanata na jam’iyyar APC ta Borno ta tsakiya ya bayyana cewa wakilan sun zabi kada kuri’a ne ta hanyar kada kuri’a kafin ya bayyana sakamakon zaben.
A cewarsa, “a bisa ikon shugaban jam’iyyar APC na kasa, Abdullahi Adamu, na bayyana, bayan na gamsu da duk wasu dokokin da suka gabata, na dokar zabe ta shekarar 1999 da aka yi wa kwaskwarima, ni, Hon. Musa Muhammad, Shugaban Kwamitin Zaben Sanatan Borno na jam’iyyar APC na 2022, ya ayyana Sanata Kashim Shettima a matsayin wanda ya lashe zaben Sanatan Borno ta tsakiya.”
Ya ce, “Ba a yi hamayya ba a zaben fidda gwani da aka gudanar a Borno ta tsakiya a ranar Asabar, wato a yau ba. Mataki na 20 na A, sashi na 3 na kundin tsarin mulkin jam’iyyar APC ya ba mu ikon gudanar da zabe ta hanyar kada kuri’a ko kuma a zahiri, amma mun zabi kada kuri’a.
“Na bayyana kamar haka: jimillar masu jefa ƙuri’a su 480,inda ya samu jimillar kuri’u 479 da kuma samu wacce bata da inganci guda 1.”
Shugaban jam’iyyar APC na Borno, Hon Ali Bukar Dalori, ya yaba wa Gwamna Zulum bisa tsayawar jam’iyyar tare da tabbatar da cewa jam’iyyar ta ci gaba da zama a dunkule.
Kazalika ya kuma yabawa Sanata Kashim Shettima bisa kyawawan ayyukan da yake gudanarwa a majalisar dokokin kasar.
Dalori ya godewa masu ruwa da tsaki da wakilai bisa yadda suka kasance cikin natsuwa, jajircewa, da kuma jefa kuri’a don baiwa jam’iyyar damar fitar da ’yan takara masu inganci a zaben 2023 mai zuwa.
