Ɗan Bindiga Ya Hallaka Tsohon Firaministan Japan Wurin Yaƙin Neman Zaɓe

Tsohon Firaministan Japan, Shinzo Abe, wanda aka harbe shi a lokacin da yake jawabi gabanin zaben majalisar dattawa da za a yi ranar Lahadi, ya mutu.

An harbe Abe a kirji da kuma wuyan sa ranar Juma’a a yammacin Japan.

Ya fadi ne a kan titi, inda jami’an tsaro da dama suka ruga zuwa gare shi, a cewar jaridar Guardian UK.

Kafar yada labaran ta nakalto daga shafin sadarwa na yanar gizo na NHK cewa, wani babban jami’in jam’iyyar Liberal Democratic Party, ya rasu ne a asibitin da yake jinya.

Rahotanni sun bayyana cewa harin an kai shi ne a birnin Nara.

Hotunan bidiyo sun nuna jami’an tsaro da ke wurin suna tunkarar dan bindigar wanda yanzu haka yake hannun ‘yan sanda.

Harin da aka kai kan Abe, wanda shi ne firaminista mafi dadewa a kasar Japan, ya girgiza kasar.

Tun da farko, Firaminista Fumio Kishida ya yi Allah wadai da matakin a wani taron manema labarai, ya kara da cewa, “Abe na cikin mawuyacin hali. Ina addu’ar ya tsira.”

Leave a Reply

Your email address will not be published. Required fields are marked *