Maryam Abubakar daliba a makarantar sakandire ta GGSSS a karamar hukumar Mashi ta jihar Katsina ta bayyana jin dadinta da sauran daliban makarantar bisa ga samuwar shirin nan na hukumar inganta ilimi da rayuwar yaya mata, AGILE a makarantar ta su.
Maryam ta ce hakika zuwan AGILE ya taimaka masu gaya wajen dakile cizon cinnaka da suke fama da shi a da saboda rashin kujerun zama a cikin azuzuwansu.
” A da ba mu da kujeru sosai a makarantar a kasa muke zama wani lokacin ma cinnaku suna cizonmu, yanzu kuwa mun samu kwanciyar hankali saboda mun samu nutsuwa.” Inji ta.
Dalibar ta ce yanzu suna ganewa sosai a wajen koyarwar da ake ma su.
Maryam Abubakar wacce tana cikin daliban da AGILE ke daukar nauyin karatunsu, ta ce tana amfani da kudin wajen hidimar karatunta.
” Ina sayen littattafai, takalmi, da dinka kayan makaranta. Gaskiya na ji dadi sosai.”
Bayan samar da kujeru da AGILE ta yi a makarantar ta GGSSS Mashi, akwai aikin gyara da gida sabbin azuzuwa da makewayi da ruwa domin samar da kyankyawan yanayi ga dalibai.



