Gwamnatin Zamfara Ta Dakatar Da Sarkin Da Ya Naɗa Ƙasurgumin Ɗan Ta’adda

Gwamna Bello Matawalle na jihar Zamfara ya dakatar da Sarkin Birnin ‘Yandoto na karamar hukumar Tsafe, Alhaji Aliyu Marafa, biyo bayan nadin sarautar da ya yiwa shugaban ‘yan fashi, Ado Alero.

A ranar Asabar ne Sarkin ya nada Alero a matsayin mukamin Sarkin Fulani.

Daukar matakin baiwa sarkin ‘yan fashin mukami ya ta’allaka ne a kan muhimmiyar rawar da ya taka a wani shirin samar da zaman lafiya da aka yi kwanan nan tsakanin masarautar da ‘yan bindigar da ke addabar karamar hukumar Tsafe.

Sai dai a wata sanarwa da sakataren gwamnatin jihar Kabiru Balarabe Sardauna ya fitar, gwamnatin ta nisanta kanta da duk wasu matakai tare da sanar da dakatar da sarkin nan take.

Ya nada Hakimin ‘Yandoto Alh. Mahe Garba Marafa, wanda zai jagoranci al’amuran masarautar.

Gwamnatin ta kuma kafa wani kwamiti mai Mutane shida karkashin jagorancin Yahaya Chado Gora domin gudanar da bincike kan lamarin da ya kai ga matakin da sarkin ya dauka.

Leave a Reply

Your email address will not be published. Required fields are marked *