Ƴan Sanda Sun Kuɓutar Da Ɗalibar Jami’ar Cross River Da Aka Sace

Rundunar ‘yan sandan jihar Cross River ta ce ta ceto Miss Josephine Etim Edet, dalibar jami’ar Arthur Jarvis da aka sace a daren ranar Talatar da ta gabata a harabar jami’ar.

A cewar rahoton da ‘yan sanda suka bayar ga ‘yan jarida, rundunar Operation Sting karkashin jagorancin Sufuritandan ‘yan sanda da ake kira Hart ta ceto Josephine daga hannun masu garkuwa da mutane.

“Sun kai farmaki maboyar ‘yan ta’addan a Akpabuyo tare da ceto wanda abin ya faru da ita a daren safiyar yau da karfe 01:12.

“Biyu daga cikin masu garkuwa da mutanen sun mutu. An kama daya da rai da munanan raunuka. An garzaya da wanda abin ya shafa da wanda aka jikkata zuwa Asibitin Koyarwa na UNICAL domin yi musu magani,” in ji rahoton halin da ake ciki.

Jami’in hulda da jama’a na rundunar ‘yan sandan, SP Irene Ugbo, ta tabbatar da ceto dalibar.

Ta ce, “Mutanenmu sun kubutar da wanda iftila’in ya afkawa,” ta kara da cewa kwamishinan ‘yan sandan jihar, Aminu Alhassan, ya bayar da umarnin a farauto ‘yan ta’addan tare da nuna godiya ga Allah da aka ceto wanda abin ya shafa da rai.

Leave a Reply

Your email address will not be published. Required fields are marked *