Dan takarar shugaban kasa na jam’iyyar PDP, Alhaji Abubakar Atiku, ya yi alkawarin samar da ‘yan sandan jihohi idan yayi nasara a zaben 2023.
Ya ce hakan zai tabbatar da magance matsalolin tsaro a kasar nan.
Atiku ya yi wannan alkawarin ne jiya Asabar a Benin, lokacin yakin neman zabensa a jihar Edo.
Atiku ya ce gwamnatinsa za ta hada kan kasar nan ne ta hanyar baiwa kowane bangare ra’ayin zama na kowa, yana mai cewa, ba za a cire wani bangare ba.
Ya ce zai maido da tsaro a kasar nan ta hanyar tabbatar da cewa an samu karin jami’an ‘yan sanda a kan tituna tare da samar musu da kayan aiki zai taka muhimmiyar rawa kan wannan hali da Najeriya ke ciki.
A nasa bangaren, Gwamna Ifeanyi Okowa ya ce Atiku na da kyau ga Najeriya kuma zai ceto al’ummar kasar daga yunwa.
A halin da ake ciki, Atiku ya ce zai fara rangadin jihohin da ke fama da matsalar ambaliyar ruwa a shiyyoyin kasar nan shida a ranar Talata.
