Zamfara ta amince da biyan albashin Maris da wuri gabanin Sallar Eid-el-Fitr

Gwamnatin Jihar Zamfara ta amince da biyan albashin watan Maris da fansho da wuri ga ma’aikatan gwamnati da masu ritaya domin su samu sauƙin shirye-shiryen bikin Sallar Eid-el-Fitr.

A cikin wata sanarwa da Kwamishinan Yaɗa Labarai da Al’adu na jihar, Muhammad Dantawasa, ya fitar, ya ce gwamnati ta kammala duk shirye-shiryen da suka dace domin tabbatar da cewa an biya duk ma’aikata da masu fansho da suka cancanta a kan lokaci kafin bikin Sallah.

Gwamnan jihar, Dauda Lawal, ya sake jaddada kudurin gwamnatinsa na kula da jin daɗin ma’aikata da masu ritaya, yana mai cewa gwamnatin za ta ci gaba da fifita manufofin da za su inganta rayuwarsu. Haka kuma ya bukaci ma’aikata da masu fansho su ci gaba da goyon bayan manufofin gwamnati tare da yin addu’ar zaman lafiya, haɗin kai da ci gaban jihar Zamfara.

Wannan mataki na nufin taimakawa ma’aikata da masu ritaya su samu kuɗi tun kafin Sallah domin su iya yin shirye-shiryen bukukuwan Eid-el-Fitr ba tare da matsin kuɗi ba. Haka kuma yana nuna ƙoƙarin gwamnati na tallafa wa ma’aikata a lokacin bukukuwa.

Leave a Reply

Your email address will not be published. Required fields are marked *