Yara Miliyan 14.7 Na Fuskantar Barazanar Cutar Tamowa A Najeriya
Asusun kula da kananan yara na Majalisar Dinkin Duniya (UNICEF) ya yi gargadin cewa kimanin yara miliyan 14.7 ‘yan Najeriya, ‘yan kasa da shekaru biyar, za su fuskanci matsananciyar rashin abinci mai gina jiki idan gwamnati da sauran masu ruwa da tsaki ba su dauki matakin gaggawa ba.
Shugaban Sashen Kula da Abinci na UNICEF a Najeriya Nemat Hajeebhoy ne ya bayyana haka a Abuja ranar Alhamis a wani taron manema labarai kan ‘Sadar da Tattaunawar Canji kan Abinci mai gina jiki’ wanda Hukumar Kula da Abinci ta Kasa (NCN) da sauran masu ruwa da tsaki suka shirya.
Shugaban UNICEF, wanda ya ce Najeriya na cikin wani yanayi na gaggawa na abinci mai gina jiki saboda ta yi asarar kashi 15 cikin 100 na GDPn da take samu sakamakon yawaitar rashin abinci mai gina jiki a kasar.
Ta ce mummunar ambaliyar ruwa, asarar noma, hauhawar farashin kayayyaki da sauran abubuwan da ke shafar samar da abinci da abinci mai gina jiki a kasar, wanda a cewarta, zai iya kara tabarbarewa a shekarar 2023, inda yara suka fi fama da matsalar.
Hajeebboy ya ce, “Idan ba a dauki matakan gaggawa ba, UNICEF ta kiyasta cewa yara miliyan 13 za su fuskanci matsananciyar rashin abinci mai gina jiki sannan kuma yara miliyan 1.7 za su fuskanci matsananciyar rashin abinci mai gina jiki a wannan shekara (2022).
“Kusan yara 100 ‘yan kasa da shekaru biyar ne ke mutuwa a Najeriya a kowace sa’a, kuma yara miliyan 12 na cikin matsanancin talaucin abinci.”
Hajeebboy ya kara da cewa farashin kayan abinci ya tashi da kashi 23 cikin 100 a cikin shekara guda da ta wuce, wanda hakan ya sa iyalai ke da wahala wajen samar da abinci mai gina jiki ga iyalansu saboda daya daga cikin gidaje uku ba zai iya samun mafi karancin abinci mai gina jiki a Najeriya.
Ta ce, “Kashi 34 bisa 100 na gidaje a Najeriya ne kawai za su iya samun abinci mafi karancin farashi da aka kiyasta a kan N1,687 na gida kowace rana.”
Ita ma Najeriya har yanzu tana matsayi na daya a Afirka kuma ta biyu a duniya wajen yawan yaran da ke fama da tamowa, inda ta yi gargadin cewa lamarin na barazana ga rayuwa, girma da ci gaban yara.
“Tsarin abinci da rashin abinci mai gina jiki suna cutar da lafiyar yara. Matsalar karancin abinci babbar barazana ce ga makomar Najeriya. Idan ba a kula da su ba, yaran da ke fama da matsanancin rashin abinci mai gina jiki (SAM), sun kusan mutuwa sau 12 fiye da yaro mai lafiya,” inji ta.
Babban mataimaki na musamman ga shugaban kasa kan abinci mai gina jiki, ofishin mataimakin shugaban kasa, Adesanmi Abimbola, ya ce rashin abinci mai gina jiki ne ke haddasa kashi 53 na mace-macen yara.
Abimbola ya ce duk wani nau’in rashin abinci mai gina jiki yana janyowa tattalin arzikin duniya asarar dala tiriliyan 35 a shekara ko kuma dala 500 ga kowane mutum.
