Sojin Sama Sun Yi Luguden Wuta A Dazuzzukan Zamfara Da Katsina, Sun Hallaka Ƴan Ta’adda 45

Sojin Sama Sun Yi Luguden Wuta A Dazuzzukan Zamfara Da Katsina, Sun Hallaka Ƴan Ta’adda 45

Rundunar sojin saman Najeriya da ke aiki a jihar Zamfara ta kashe wani shugaban ‘yan bindiga, wanda aka fi sani da Dogo Rabe da wasu ‘yan kungiyarsa sama da 45 a dazuzzukan Zamfara.

Jami’an rundunar sojin saman Najeriya sun yi ruwan bama-bamai a sansanonin ‘yan bindigar da ke tsakanin al’umomin Zurmi da Birnin Magaji a jihar Zamfara da Jibia a jihar Katsina, kamar yadda wata majiyar tsaro ta bayyana.

Majiyar Jaridar Jakadiya ta ruwaito cewa, kwanaki kadan kafin kai harin bama-baman, an kai wani hari makamancin wannan a sansanin na wani jagoran ‘yan bindiga, Bello Turji da ke unguwar Fakai a jihar, inda aka kashe ‘yan bindiga a kalla 22, yayin da Turji ya tsere da rayuwarsa.

A cewar wata majiya daga yankin, Abdulbaqi Aliyu, harin na baya-bayan nan ya yi sanadin mutuwar ‘yan bindiga a kalla 40 a yankin Birnin Magaji na jihar.

“Rundunar sojin saman Najeriya ta kai farmaki a dajin Sabon Birini Dan Ali, a karamar hukumar Birini Magaji, wanda ya yi sanadin kashe ‘yan fashin sama da 40,” inji shi.

An kai harin ne a lokacin da aka ce gungun na lodin shanun da suka sata.

Leave a Reply

Your email address will not be published. Required fields are marked *